काठमाडौं, ३० जेठ २०८०
काठमाडौँमा चिकित्सक बिनाका अबैध क्लिनिकहरु सञ्चालनमा रहेको पाइएको छ ।
विशेषगरी ब्युटी र स्कीन (छाला) सम्बन्धि काम गर्ने क्लिनिकहरुमा चिकित्सकविना उपचार गरीरहेका छन्।
नेपाल मेडिकल काउन्सिलका प्रवक्ता डा. कृष्ण प्रसाद अधिकारीका अनुसार सोमबार भएको अनुगमनमा बालुवाटारस्थित कोरियन स्कीन केयर क्लिनिक, सिटीसेन्टरस्थित कोरियन ब्युटी क्लिनिक एण्ड केयर, नक्सालस्थित ब्युटी क्लबमा डाक्टर नभएको पाइएको छ।
यी क्लिनिकहरुमा नक्कली उपचार हुने गरेको छ । नेपाल मेडिकल काउन्सिलको अनुगमनमा क्रममा चिकित्सकबिनाकै क्लिनिकहरु संचालनमा रहेको पाइएको छ । सोमबार काउन्सिलको इथिकल कमिटीका संयोजक डा. कालुसिंह खत्री नेतृत्वको अनुगमन टोलीले गरेको अनुगमनका गरेको थियो ।
छाला र ब्युटी सम्बन्धि काम गर्ने तीन वटै संस्थामा चिकित्सकहरु कार्यरत छैनन् ।
तर स्कीन सम्बन्धि चिकित्सकहरुले मात्रै गर्नुपर्ने केही उपचार तीन वटै संस्थामा हुने गरेको अनुगमनका क्रममा फेला परेको हो । बालुवाटारस्थित कोरियन स्कीन क्लिनिकमा चिकित्सकबिना चिकीत्सकीय काम भइरहेको उजुरीका आधारमा काउन्सिलको टोली अनुगमनमा पुगेको थियो । सो क्रममा चिकित्सकको प्रेस्क्रीप्सन बिना दिन नमिल्ने औषधि र उपचार उक्त क्लिनिकमा हुने गरेको भेटिएको छ । यस्तै, नक्सालस्थित ब्युटी क्लबले चिकित्सकबिना नै चिकित्सकले गर्ने स्कीन सम्बन्धि ट्रिटमेन्ट गरेको उजुरी थियो । उक्त क्लबको अनुगमन गरेर काउन्सिलले थप कारवाही प्रक्रिया अगाडि बढाएको छ ।
सिटी सेन्टरस्थित कोरियन ब्युटी क्लिनिक एण्ड केयरले पनि चिकित्सकबिना चिकीत्सकीय उपचार सम्बन्धि काम गरेको उजुरीका आधारमा काउन्सिलले अनुगमन गरेको हो । उक्त क्लिनिकमा पनि चिकित्सकले गर्ने काम भइरहेको अनुगमनको क्रममा फेला परेपछि काउन्सिलले कागजातसहित संचालकलाई काउन्सिलमा उपस्थित हुन निर्देशन दिएको छ ।
यस्तैगरी अनुगमनका क्रममा योग्यताबिना र योग्यताभन्दा बढी प्रायक्टिस गर्नेमाथि पनि काउन्सिलले कारवाही अगाडि बढाएको हो।
