धादिङ, २३ भाद्र २०८०
धादिङ जिल्लाकै सबभन्दा ठुलो सरकारी स्वास्थ्य संस्था धादिङ्ग अस्पतालले युवा डाक्टर रुद्र भण्डारीको नेतृत्वमा काँचुली फेर्दै गएको छ।
जिल्ला सदरमुकाम धादिङबेशीस्थित धादिङ अस्पतालले विशेषज्ञ सेवा दिएर आफूलाई सुधार्ने र स्वरूप फेर्ने क्रममा लागेको छ ।
पहिले सीमित चिकित्सकबाट उपचार सेवा दिँदै आएकोमा अहिले ८५ शय्या क्षमताको यो अस्पतालमा अहिले २५ जना चिकित्सक कार्यरत रहेको अस्पतालका मेडिकल सुपरिटेन्डेन्ट डा. रुद्र भण्डारीले बताउनुभयो।
अस्पतालमा अहिले गाइनो, एपेन्डिसाइटिस, हड्डी, हर्निया र हाइड्रोसिलको श्लयक्रिया हुँदै आएको डा. भण्डारीले बताए।
उनले भने, पुरानो भवनमा सेवा दिइरहेको यो अस्पतालले आफ्नो छुट्टै ३० लाखको लागतमा सिटिस्क्यान भवन निर्माण भएको छ। १५० जना दक्ष जनशक्ति र अस्पतालको पाङ्गणमा पार्किङको व्यवस्था रहेको छ। सिटि स्क्यान मेसिन चाँडै नै शुरु हुन्छ।
यस्तैगरी अर्को महिनादेखि छाला तथा नाक, कान घाँटी रोग विशेषज्ञ डाक्टरहरु बाहिर बाट लिएर सेवा दिने योजना रहेको छ।
बागमती प्रदेश सरकार स्वास्थ्य निर्देशनालयको आयोजनामा MSS (न्युनतम सेवा फलोअप मापदण्ड मापन कार्यक्रम) अन्तर्गत भएको कार्यक्रममा धादिङ अस्पतालले ९६% प्राप्त गर्न सफल भएको डा. भण्डारीले बताए।
अस्पताल विकास समितिका अध्यक्ष राजाराम रिजालले बागमती प्रदेश सरकारले उक्त अस्पतालको क्षमता विस्तार गरी एक सय शय्या बनाउन लागेको जानकारी दिनुभयो ।
रिजालका अनुसार अहिले दैनिक अस्पतालमा ५ सय भन्दा बढी ओपिडी र आकस्मिक सेवाका बिरामी आउने गरेका छन् । चिकित्सकसहित जनशक्ति थपिँदै गए पनि अहिले पनि पर्याप्त जनशक्ति नरहेको उनले बताए।
बागमती प्रदेशका मुख्यमन्त्री शालिकराम जमकट्टेलले मेरो जन्मभूमि धादिङमै भएकाले यो अस्पताललाई नमुना अस्पताल बनाउने बताउनु भयो ।
मन्त्री जमकट्टेलले यस अस्पतालमा सवै विभागका रोग विशेषज्ञ चिकित्सक पुर्याउने बाचा पुरा गर्ने बताए।
धादिङ अस्पतालमा नेपालमै पहिलोपटक Liquid Waste Management शुरु गरेको छ। इटालीबाट ल्याएर बागमती प्रदेश सरकारले सुचारुमा ल्याएको हो।
