काठमाडौं, ५ माघ २०७९
नेपालको सबैभन्दा पुरानो वीर अस्पतालमा क्याथ ल्यावको सेवा शुरु भएको छ ।
बिहीबार स्वास्थ्यमन्त्री पदम गिरी र राज्यमन्त्री डा. तोसिमा कार्कीले अस्पतालको कार्डियोलोजी विभागमा क्याथ ल्यावको शुभारम्भ गरेका हुन् ।
शुभारम्भ कार्यक्रममा बोल्दै स्वास्थ्यमन्त्री गिरीले सुलभ स्वास्थ्य सेवा सबै जनताको पहुँचसम्म पुर्याउन मिलेर काम गर्नुपर्ने बताए। उनले भने, ‘विपन्न, गरिब नागरिकहरूसम्म स्वास्थ्य सेवा पुग्नुपर्छ। त्यसको लागि हाम्रो दायित्व छ। हामीले मिलेर काम गर्नुपर्छ। संरचनात्मक सुधारहरू गर्नुपर्ने कुराहरू छ। त्यो हामी गर्छौँ। सबै जनताको पहुँचमा स्वास्थ सेवा पुर्याउन जरूरी छ।’ स्वास्थ्य सामग्रीहरू अस्पतालमा ल्याउँदा गुणस्तरीय र भरपर्दो ल्याउन पनि मन्त्रीले निर्देशन दिनुभयो।
स्वास्थ्य राज्यमन्त्री डा. कार्किले अस्पताललाई चाहिनेजति सहयोग गर्ने बताइन्। डा. कार्कीले स्वास्थ्यकर्मी तथा कर्मचारीहरुलाई उच्च मनोवलका साथ काम गर्न पनि निर्देशन दिइन्।
कार्यक्रममा अस्पतालका निर्देशक डा. भुपेन्द्र बस्नेतले अस्पतालको बारेमा जानकारी दिँदै नर्सिङ जनशक्ति, एमआरआइ, सिटी स्क्यान मेसिनहरू थप्न अनुरोध गरेका थिए। साथै उनले मन्त्रालयबाट अस्पतालले पाउनुपर्ने अनुदान बढाउन पनि माग गर्दै बिगतका वर्षहरुमा भन्दा अनुदान बढी चाहिने पनि जानकारी दिए। क्याथल्याबमा प्रायः मुटुको प्राइमरी एन्जिओप्लाष्टिकका लागि शल्यक्रिया गरी नशा खोलेर बचाउन सकिन्छ।
डा. बस्नेतले क्याथल्याब सञ्चालन भएपछि कुनै पनि मुटुका बिरामीको उपचार यहीअस्पतालमै गर्न सकिने जानकारी दिए। वीर अस्पतालमा दैनिक दुई सय जति मुटुका बिरामी उपचारका लागि आउने गर्दछन्।
कार्यक्रममा चिकित्सा विज्ञान राष्ट्रिय प्रतिष्ठानका उपकुलपति डा. देवनारायण साहले अस्पताललाई विशिष्टिकृत अस्पताल बनाउन क्याथल्याब सेवा सुरु गरिएको बताए।
अस्पतालका कार्डियोलोजिस्ट डा. समीर पौडेलले क्याथ ल्याब संचालनमा आएकोमा खुसी व्यक्त गर्दै अबका दिनमा बिरामीलाई सहज हुने बताए। डा. पौडेलले यो अस्पताल गरिब निमुखाको लागि मात्रै उपचार नभएर हामी सबैको लागि साझा भएको बताए। उहाँले सबैभन्दा सस्तो र गुणस्तरीय सेवा यही अस्पतालमा हुने भएकाले स्वास्थ्य मन्त्रालयको विशेष सहयोग हुने अपेक्षा पनि राख्नुभयो। कार्डियोलोजी विभागमा अहिले चार जना कार्डियोलोजी चिकित्सकहरु छन।
कार्यक्रममामा स्वास्थ्य मन्त्रालयका स्वास्थ्य सचिवद्वय डा. रोशन पोखरेल र देवकुमारी गुरागाईँको पनि उपस्थिति थियो। उद्घाटन कार्यक्रमकै अवसरमा स्वास्थ्यमन्त्री गिरी र राज्यमन्त्री कार्कीले अस्पतालको हेमोडाइलासिस वार्ड लगायतका विभिन्न वार्डहरू निरीक्षण पनि गरेका थिए।
