काठमाडौं, २६ पुष २०८०
वीर अस्पतालमा स्तन क्यान्सरको उपचारका लागि अत्याधुनिक उपकरण सञ्चालन गरिएको छ ।
स्तन क्यान्सर परीक्षण (स्क्रिनिङ) का लागि अत्याधुनिक उपकरण ‘मेमोग्राम’ सञ्चालन गरिएको हो ।
अस्पतालका निर्देशक डा. सन्तोष पौडेलले स्तनमा क्यान्सर रोग लाग्नुभन्दा पहिल्यै क्यान्सरका लक्षण पत्ता लगाउने विधिलाई स्क्रिनिङ भनिने जनाउँदै सरकारी अस्पतालमा पहिलो पटक अत्याधुनिक क्यान्सर स्क्रिनिङ उपकरण ‘मेमोग्राम’ सञ्चालन गरिएको जानकारी दिनुभयो ।
डा. पौडेलका अनुसार ४० वर्षभन्दा माथिका महिलाको स्तन क्यान्सर स्क्रिनिङ गर्नका लागि उक्त उपकरण प्रयोग गरिन्छ ।
“क्यान्सरका लक्षण देखापर्ने अघिको अवस्थामा पत्ता लगाउने विधिलाई स्क्रिनिङ भनिन्छ । यो परीक्षणको एउटा विधि हो । क्यान्सर फैलनुअगावै थाहा पाउन सकियो भने प्रभावकारी उपचार गर्न सकिन्छ”, डा. पौडेलले भन्नुभयो । उहाँका अनुसार अहिले दैनिक तीनदेखि चार जना महिलाको क्यान्सर स्क्रिनिङ गरिँदै आइएको छ । स्तनमा क्यान्सरको समस्या देखिनुभन्दा पहिले नै लक्षण पहिचान गर्नका लागि यो विधि प्रयोग गरिने उहाँको भनाइ थियो ।
स्तन क्यान्सरको स्क्रिनिङ गर्नका लागि रु. एक हजार पाँच सय शुल्क तोकिएको अस्पताल प्रशासनले जनाएको छ ।
वीर अस्पतालका वरिष्ठ क्यान्सर रोग विशेषज्ञ डा. विबेक आचार्यले नेपालका महिलामा हुने क्यान्सरमध्ये स्तन क्यान्सर दोस्रो नम्बरमा रहेकाले समयमा नै स्क्रिनिङ गर्न आवश्यक रहेको बताउनुभयो । डा. आचार्यका अनुसार महिलामा देखिने पहिलो क्यान्सर पाठेघरको मुखको क्यान्सर हो ।
नेपालमा दैनिक तीन जना महिलाको स्तन क्यान्सरका कारण मृत्यु हुने गरेको पनि डा. आचार्यले जानकारी दिनुभयो । समयमा नै स्तन क्यान्सरसम्बन्धी रोग पत्ता लगाउन सके प्रभावकारी उपचारका माध्यमबाट बिरामीलाई बचाउन सकिने उहाँको भनाइ थियो ।
वरिष्ठ क्यान्सर रोग विशेषज्ञ डा. उज्ज्वल चालिसेले स्तनपान नगराउने, विवाह नगरेका, सानै उमेरमा महिनावारी हुने, चाँडै महिनावारी सुक्ने, दिनमा सुत्ने तथा रातमा काम गर्ने वा जाग्राम बस्ने महिलालाई स्तन क्यान्सर हुने गरेको बताउनुभयो । मोटोपन, धूम्रपान गर्ने, व्यायाम नगर्ने, वंशाणुगत गुण र कुनै क्यान्सर भएका महिलालाई रेडिएसन दिँदा (सेक्दा) पनि पछि स्तन क्यान्सर हुने गरेको डा. चालिसेले जानकारी दिनुभयो ।
