काठमाडौं, २२ माघ २०८१
भक्तपुर क्यान्सर अस्पतालले पछिल्लो समय दिएको स्वास्थ्य सेवाबाट बिरामीहरु प्रभावित भएका छन् । पहिले पहिले केमो र रेडियोथेरापीका लागि चार महिनाभन्दा बढी समय सम्म ओआलो कुर्नुपरेको अवस्था थियो। पछिल्लो समय भक्तपुर क्यान्सर अस्पतालले १० दिनमै केमोथेरापी र रेडियोथेरापीको लागि पालो आउने गरेको अस्पतालका कार्यकारी निर्देशक डा. उज्ज्वल चालिसेले बताए।
अस्पतालमा पहिले पालो कुर्नुपर्ने भएर निजि अस्पतालमा जान बाध्य थिए तर अहिले क्यान्सर अस्पतालमा जुनसुकै उपचारपनि छिटो छरितो हुने गरेको डा.चालिसेले बताए।
डा. चालिसेका अनुसार बिरामीलाई समयमा बेड पाउन कठिन, केमोथेरापी या रेडियोथेरापी गर्नको लागि महिनौँसम्म पालो कुरेर बस्नुपर्ने, अस्पतालको फार्मेसीमा एकाध प्रकारका मात्र औषधी पाउने हुन्थ्यो । शैया उपलब्ध हुने देखि लिएर, केमोथेरापी, रेडियोथेरापी तथा शल्यक्रिया लगायतको लागि अब समय कुरिरहनुपर्दैन । अस्पतालमा सिनिएर चिकित्सकलाई भेटाउन पनि सहजै सकिन्छ ।
केही महिनाअघि सम्म भक्तपुर क्यान्सर अस्पतालको फार्मेसी प्रायः रित्तो हुने गर्दथ्यो । चिकित्सकले प्रेस्किप्सन गरेका औषधी खरिद गर्न अस्पताल बाहिरका फार्मेसीमा जानुपर्ने बाध्यता थियो । स्वास्थ्य बीमाका औषधी समेत पाइदैनथियो । तर पछिल्लो समय अस्पतालमा फार्मेसीमात्र होइन, अस्पतालको व्यवस्थापकीय पक्ष, अस्पतालले दिने सेवा सुविधा समेत चुस्त हुँदै गएको छ । क्यान्सरका बिरामीका लागि शल्यक्रिया, केमोथेरापी तथा रेडियोथेरापीका लागि समेत बढीमा १५ दिनमा पालो आउने गरेको छ । पहिले–पहिले केमो र रेडियोको लागि तीनमहिनाभन्दा बढी समय पालो कुर्नुपर्दथ्यो । 
निर्देशक डा. चालिसेले अस्पतालमा बिरामीले राहत महसुस गरिरहेको बताए । उनले अब उपचारको लागि निजी अस्पताल धाउनुपर्ने बाध्यता हटेको बताए ।
डा.चालिसेले अस्पतालको फार्मेसीमा ९० प्रतिशत औषधी पाउने गरेको जानकारी दिए । नेपालमा दर्ता नभएका औषधी मात्र नपाउने गरेको उनको भनाई छ ।
नेपाल नल्याएका औषधीबाहेक अन्य सबै औषधी फार्मेसीमा पाउने गरेको उनको भनाई छ । निर्देशक डा. चालिसेले यसबाहेक अस्पतालमा दुईवटा शल्यक्रिया कक्षलाई बढाएर पाँचवटा पुर्याएको बताए । अब शल्यक्रियाका लागि समय लाग्दैन, डा.चालिसेले भने ,“तत्काल शल्यक्रिया गर्न पाउँदा बिरामीले ठूलो राहत हुनेछ ।”
डा. चालिसेले अस्पतालले विस्तारित सेवालाई समेत प्रभावकारी बनाएको जानकारी दिए । उनले विराटनगरको कोशी अस्पतालमा भक्तपुर क्यान्सर अस्पतालको सहयोगमा केमोथेरापीको उपचार सुरु भइसकेको जानकारी दिदै समय समयमा अस्पतालबाट विशेषज्ञ टोली गएर क्यान्सर रोगको उपचार गर्ने गरेको बताए ।
यसैबीच आज विश्व क्यान्सर नेपालमा विभिन्न कार्यक्रमको आयोजना गर्दै मनाउन लागिएको छ।
