बर्दिया, १७ असोज २०८१
लुम्विनी प्रदेश मातहतमा रहेका १४ वटा अस्पतालहरु मध्ये बर्दिया अस्पताल पछिल्ला पाँच वर्षदेखि लगातार उत्कृष्ट हुँदै आएको छ ।
आर्थिक वर्ष २०८०-०८१ मा पनि स्वास्थ्य कार्यक्रमहरु सफलतापूर्वक सम्पन्न गरी मुख्य-मुख्य सुचांकहरुको आधारमा गरिएको मूल्यांकनमा प्रदेश मातहत अन्तर्गत रहेका अस्पतालहरु मध्ये बर्दिया अस्पताल पहिलो हुन सफल भएको हो ।
यसअघि २०७७/०७८/० ८० मा पनि पहिलो भएको थियो । २०७९ मा भने दोस्रो भएको थियो । स्वास्थ्य निर्देशनालय लुम्विनीले लमहीमा आयोजना गरेको प्रदेश स्तरीय वार्षिक समिक्षामा ७२.४२ प्रतिशत अंक ल्याएर बर्दिया अस्पताल प्रथम हुन सफल भएको अस्पतालका मेडिकल सुपरिटेन्डेन्ट डा. सुभाष पाण्डेले जानकारी दिनुभयो।
त्यसैगरी लुम्विनी प्रादेशिक अस्पताल ६८.०९ प्रतिशत अंक ल्याएर दोस्रो र अर्घाखाँची अस्पताल ६३.५४ प्रतिशत अंक ल्याएर तेस्रो भएका छन् । गुणस्तरीय स्वास्थ्य सेवा प्रवाह, इमरजेन्सी, बहिरंग सेवा, फार्मेसी, प्रयोगशाला, अस्पताल प्रशासन, सुशासन, जवाफदेहिता लगायतका सूचांकका आधारमा बर्दिया अस्पताल अब्बल बन्दै आएको छ ।
५० शय्याको अस्पतालमा विशेषज्ञ जनशक्ति र उपकरणको अभावका बीच पनि अस्पतालले स्तरीय सेवा प्रदान गर्दै आइरहेको मेसु डा. पाण्डेले बताए । जनशक्ति अभावबीच न्यूनतम जनशक्तिले पनि अत्याधुनिक प्रयोगशाला, सुत्केरी सेवा, चौविसैं घण्टा ईमरजेन्सी र फार्मेसी खुला रहने गरेको मेसु डा. पाण्डेले बताए ।
पछिल्लो समय मिर्गौला रोगका बिरामीलाई डायलाइसिस सेवा समेत अस्पतालले प्रवाह गर्दै आएको छ । उपचार सेवा राम्रो भएपछि बर्दिया अस्पतालमा विरामीको चाप बढेको छ।
