बर्दिया, २२ पुष २०७९
बर्दिया अस्पतालमा अब देखि नियमित निःशुल्क रुपमा महिला/पुरुष स्थायी बन्ध्याकरण गर्ने भएको छ ।
अस्पतालले एमसिएच शाखाबाट दिने सेवाहरुमा समाबेस गरि यहि पुष महिनाबाट निःशुल्क रुपमा स्थायी बन्ध्याकरण गर्ने भएको हो । साथै बन्ध्याकरण गर्ने महिला/पुरुषलाई नेपाल सरकारले तोके बमोजिमको खाजा खर्चसमेत अस्पतालले उपलब्ध गराउने भएको छ । सन्तानको रहर पुगेका परिवारले अब देखि अस्पतालबाट नियमित रुपमा स्थायी बन्ध्याकरण गराउन सक्ने छन् । सन्तानको रहर पुगेका परिवारले लामो समय अस्थायी साधनको प्रयोग गर्दा समेत स्वास्थ्यमा असर पर्न सक्ने स्वास्थ्यकर्मीले दावीसमेत गरिरहेका छन् ।
बर्दिया अस्पतालमा भ्यासेक्टोमी र मिनिल्यापको लागि दक्ष जनशक्ति उपलब्ध रहेको वरिष्ठ मेडिकल सुपरिन्टेन्डेन्ट डा. सुभाष पाण्डेयले जानकारी दिनुभयो । मेसु डा. पाण्डेयले भने,‘अब देखि अस्पतालले स्त्री विशेषज्ञ द्वारा स्थायी बन्ध्याकरणको सेवा नियमित रुपमा दिनेछ ।’ यो जिल्लावासीको लागि सुखद रहेको बताए । पहिला निश्चित अवधिको लागि स्थायी बन्ध्याकरणको शिविर संचालन हुने गरेको थियो भने अब देखि अस्पतालले नियमित निःशुल्क रुपमा बन्ध्याकरण गर्ने भएको हो। यसको साथै अस्पतालले महिलाहरुको आङ खस्ने समस्याको पनि अप्रेशन गर्ने भएको हो।
सन्तानको रहर पुगिसकेका इच्छुक दाम्पतीले सहज रुपमा स्थायी बन्ध्याकरण गराउन सकिने स्त्री तथा प्रसुति रोग विशेषज्ञ डा. राम विश्वास रायले बताए । ‘स्थायी बन्ध्याकरण गराउने इच्छुक दाम्पत्तीले अब शिविर कहिले आउँने कुर्नु पर्दैन’स्त्री रोग विशेषज्ञ डा.रायले भने,‘अस्पतालमा नियमित रुपमा स्थायी बन्ध्याकरण सेवा संचालन भएको छ ।’ प्रत्येक हप्तामा दुई पटक बन्ध्याकरण हुनेछ । बुधबार र शुक्रबार दिन अस्पतालले स्थायी बन्ध्याकरण गर्ने योजना बनाएको स्त्री रोग विशेषज्ञ डा.रायले जानकारी दिए ।
साथै यस आर्थिक वर्षमा वरिष्ठ सर्जन डा. बिजय उपाध्यायको नेतृत्वमा १२० जनाको निशुल्क हाइड्रोसिल शल्यक्रिया मध्ये ५५ जनाको सफल भएको र ६५ जनाको बाकी रहेको मेसु डा. पाण्डेयले बताए।
यस्तैगरी अस्पतालले आङ खस्ने ( UV prolapse or Uterovaginal prolapse) महिलाको पाठेघरको समस्या निशुल्क शल्यक्रिया गर्ने भएको छ।
यो आर्थिक वर्षमा अस्पतालले निःशुल्क सर्जरी अफ मिनिल्याप (महिलाको स्थायी बन्ध्याकरण), भेसिक्टोमी ( पुरुषको स्थायी बन्ध्याकरण) र हाइड्रोसिल उटेरोभजिनल प्रोलाप्से गरिरहेको छ।
अस्पतालमा आउने सबै बिरामीहरुको लागि बल्ड निशुल्क रहेको र यसको व्यवस्थापन गर्दा बल्ड बैंकमा कुनै शुल्क तिर्नु पर्दैन। यसको साथै अस्पतालमा सिकलसेल रोगको पनि निशुल्क निदान तथा उपचार हुन्छ। यसमा HB Electrophoresis जाँच पनि नियमित अस्पताल प्रयोगशाला मार्फत अस्पतालले निशुल्क गर्दै आएको छ।
