काठमाडौं, २४ कात्तिक २०८०
स्वास्थ्य तथा जनसंख्या मन्त्री मोहनबहादुर बस्नेतको उपस्थितिमा चिकित्सा विज्ञान राष्ट्रिय प्रतिष्ठान (न्याम्स) वीर अस्पताल र नेपाल ससस्त्र प्रहरी अस्पतालबिच भविश्यमा शैक्षिक कार्यक्रम सञ्चालन गर्ने समझदारी भएको छ ।
स्वास्थ्य तथा जनसंख्या मन्त्रालयमा शुक्रबार आयोजित समारोहमा न्याम्सका उपकुलपति प्रा.डा.भुपेन्द्र बस्नेत र नेपाल ससस्त्र प्रहरी अस्पतालका मेडिकल डाइरेक्टर डा. रुपक महर्जनले भविश्यमा न्याम्सले ससस्त्र प्रहरी अस्पतालमा आफ्ना शैक्षिक कार्यक्रम बिस्तार गर्ने समझदारीपत्रमा हस्ताक्षर गरेका हुन । यो समझदारी पछि न्याम्सले निकट भविश्यमा आफ्ना उच्च तहका शैक्षिक कार्यक्रम ससस्त्र अस्पतालमा पनि बिस्तार गर्ने छ ।
कार्यक्रममा बोल्दै स्वास्थ्य तथा जनसंख्या मन्त्री बस्नेतले गुणस्तरीय स्वास्थ्य सेवा उपलब्ध गराउन उच्च स्तरको दक्ष जनशक्ति आवश्यक पर्ने बताउदै न्याम्स र ससस्त्र प्रहरी अस्पताल बिच भएको शैक्षिक कार्यक्रम सञ्चालन गर्ने समझदारीले स्वास्थ्य क्षेत्रमा थप दक्ष जनशक्ति उत्पादन हुने आशा व्यक्त गरे ।
मन्त्री बस्नेतले शान्ति सुरक्षाका अलावा ससस्त्र प्रहरीले स्वास्थ्य उपचारका क्षेत्रमा पनि उल्लेखनीय कार्य गरेको भन्दै स्वास्थ्य मन्त्रालयले ससस्त्र प्रहरी अस्पताललाई सक्दो सहयोग जारी राख्ने आश्वासन दिए । नेपाल ससस्त्र प्रहरी महानिरीक्षक राजु अर्यालले न्याम्ससँगको शैक्षिक समझदारीले भविश्यमा ससस्त्र प्रहरी अस्पतालले मेडिकल कलेज स्थापना गर्ने ढोका खोल्ने बताए ।
स्वास्थ्य तथा जनसंख्या मन्त्रालयकी सचिव डा. देवकुमारी गुरागाइले चिकित्सा क्षेत्रमा उच्च स्तरको जनशक्ति उत्पादन गर्ने क्षेत्रमा यो समझदारीले फड्को मार्ने बताइन । 
न्याम्सका उपकुलपति प्रा.डा. भुपेन्द्र बस्नेतले न्याम्सका पदाधिकारीले निरीक्षण गर्दा ससस्त्र प्रहरी अस्पतालले प्रदान गरिरहेको उपचार सेवा र प्रयाप्त भौतिक पूर्वाधार भएको पाइएपछि शैक्षिक कार्यक्रम सञ्चालन गर्नका लागि समझदारी पत्रमा हस्ताक्षर गरेको बताए ।
ससस्त्र प्रहरी अस्पतालका मेडिकल डाइरेक्टर डा. महर्जनले यो समझदारीपछि ससस्त्र प्रहरी अस्पतालमा शैक्षिक वातावरण सिर्जना हुने बताउदै यसले अस्पतालले गुणस्तरीय सेवा प्रदान गर्ने कार्यमा सकारात्मक प्रभाव पार्ने आशा व्यक्त गरे ।
न्याम्सका रेक्टर डा. लोचन कार्कीले न्याम्सले अनुगमन र निरीक्षण पछि देशका विभिन्न हस्पिटलहरुसँग सहकार्य गर्दै आफ्ना उच्च तहका शैक्षिक कार्यक्रम अगाडि बढाइरहेको बताए ।
न्याम्सका रजिस्टार डा. ज्ञानेन्द्र शाहले ससस्त्र प्रहरी अस्पताल र न्याम्सबिच भएको समझदारीले चिकित्सा शिक्षामा नयाँ फड्को मार्ने विश्वास व्यक्त गरे । ११० शैयाबाट सुरु गरिएको ससस्त्र प्रहरी अस्पताल अहिले १९० शैयामा सञ्चालित छ ।
