लमजुङ, ११ भाद्र २०७९
गण्डकी प्रदेशअन्तर्गत पहाडी जिल्ला लमजुङको बेँसीसहर नगरपालिका–८ स्थित जिल्ला अस्पताल लमजुङमा शुक्रबार अर्थात् भाद्र १० देखि निशुल्क डाइलासिस सेवा सुरु भएको छ ।
गण्डकी प्रदेश सरकारको आर्थिक सहयोगमा यो सेवा पहिलो पटक सुरु भएको हो ।
जिल्ला अस्पतालले बिहीबार एक सूचना जारी गरी हेमोडाइलासिस सेवाका लागि अस्पतालमा दर्ता गर्न अनुरोध गरेको थियो ।दोर्दी गाउँपालिका–८ की ७० वर्षीय महिला अनारसि गुरुङलाई सेवा दिँदै जिल्लामा डाइलासिस सेवा शुभारम्भ गरिएको जिल्ला अस्पताल लमजुङका प्रमुख प्रशासकीय अधिकृत हेमन्त श्रेष्ठले बताए ।
दुवै मिर्गौला फेल भएर विगत तीन वर्षदेखि दमौली अस्पताल तनहुँमा उपचार गराउँदै आएकी गुरुङ जिल्लामै यो सेवा पाउने पहिलो व्यक्ति पनि भएका छन् ।
यस अस्पतालका अनिसा थापा, सिर्जना तामाङ, मुना राई र सुनिता थापा र धौलागिरी अस्पताल बागलुङबाट आएका स्टाफ नर्स बेलिसरा भुजेल, सावित्री बस्याल लगायतको टोलीले उक्त सेवा दिएको अस्पतालले जनाएको छ।
