बझाङ, ३ बैशाख २०८२
थलारा गाउँपालिकाको आयोजनामा, स्वास्थ्य कार्यालय बझाङ र स्वास्थ्य निर्देशनालय डोटीको प्राविधिक सहयोगमा गत चैत २६ देखि २८ सम्म तीन दिने सक्रिय क्षयरोग खोजपडताल शिविर सम्पन्न भएको छ।
शिबिरका क्रममा संकलन गरिएका खकारको नमुना परिक्षण भएको हो।न
शिविर गाउँपालिकाका ९ वटै वडामा संचालन गरिएको थियो, जसमा कुल ८६६ जनाको अत्याधुनिक कृत्रिम बुद्धिमत्ता (AI) जडित मेसिन बाट छातीको एक्सरे गरिएको छ। एक्सरे रिपोर्टको आधारमा ५१ जनामा क्षयरोगको सम्भावना देखिएकोले उनीहरूबाट खकार सङ्कलन गरिएको छ।
सङ्कलित खकार नमुनाहरूलाई विश्व स्वास्थ्य संगठन (WHO) ले सिफारिस गरेको Molecular Diagnostic प्रविधि mWRD (मालिक्युलर र्यापिड डिटेक्सन) प्रयोग गरी परीक्षण गरिएको थियो। परीक्षणका क्रममा ६ जनामा क्षयरोगको जीवाणु (Mycobacterium tuberculosis) पुष्टि भएको स्वास्थ्य कार्यालय बझाङका ल्याब टेक्निसियन निरीक्षक नारायण जोशीले जानकारी दिनुभयो।
जोशीका अनुसार ती बिरामीहरूलाई उपचारमा ल्याउने कार्य आजैदेखि थालिएको छ र पालिका तथा सम्बन्धित स्वास्थ्य संस्थालाई जानकारी भएको हो।
यस्तैगरी, AI एक्सरे रिपोर्टमा क्षयरोगको सम्भावना देखिए तापनि खकारमा जीवाणु नदेखिएका व्यक्तिहरूलाई निगरानीमा राखिने र आवश्यकताअनुसार पुनः परीक्षण गरिने निरीक्षक जोशीले बताउनु भयो।
बझाङ जिल्ला कारागारमा रहेका कैदी बन्दीहरूमा पनि क्षयरोगको परीक्षण (TB Screening) गरिएको थियो, तर कुनैमा पनि क्षयरोग नदेखिएको स्वास्थ्य कार्यालयले जनाएको छ।
