काठमाडौं, २७ साउन २०८२
त्रिभुवन विश्वविद्यालय कार्यकारी परिषदको २०८२ साउन १९ गतेको निर्णयअनुसार त्रिभुवन विश्वविद्यालय, चिकित्साशास्त्र अध्ययन संस्थान अन्तर्गतको जनस्वास्थ्य केन्द्रीय विभागको प्रमुखमा राजन पौडेल नियुक्त भएका छन्।
पूर्व प्रमुख प्राध्यापक डा. आमोद कुमार पौड्याल २०८२ साउन १६ गते अनिवार्य अवकाशमा गएपछि रिक्त भएको पदमा पौडेललाई नियुक्त गरिएको हो। पौडेल MPH र MPhil दुवैमा Gold Medalist हुन् भने हाल फिनल्याण्डबाट Epidemiology and Public Health विषयमा PhD गर्दै छन्। साथै, उनले अमेरिकास्थित Johns Hopkins University बाट Epidemiology and Biostatistics मा Summer Course र Tanzania बाट Global Health Course सम्पन्न गरेका छन्।
पौडेलले स्वास्थ्य तथा जनसंख्या मन्त्रालयको पोषण, खाद्य सुरक्षा र विषादी नियन्त्रण उप-समितिको अध्यक्ष, चिकित्सा शिक्षा आयोगको समिति सदस्य, तथा नेपाल स्वास्थ्य व्यवसायी परिषदको बोर्ड सदस्य र परीक्षा संयोजकको रूपमा कार्य गर्दै आएका छन् । ६ दर्जनभन्दा बढी अन्तर्राष्ट्रिय जर्नलमा वैज्ञानिक लेख प्रकाशित गरेका पौडेल प्राज्ञिक क्षेत्रमा अब्बल मानिन्छन्।
जनस्वास्थ्य केन्द्रीय विभागको स्थापना २०७५ भाद्र १० गते भएको हो। यो विभाग त्रिभुवन विश्वविद्यालय अन्तर्गत जनस्वास्थ्य विषयको अध्ययन–अध्यापन हुने एक मात्र आंगिक शैक्षिक संस्था हो।
