काठमाडौं, १५ भाद्र २०८२
त्रिभुवन विश्वविद्यालय, चिकित्सा शास्त्र अध्ययन संस्थान अन्तर्गतको जनस्वास्थ्य केन्द्रीय विभागले भदौ ११ गते सातौं वार्षिकोत्सव उत्साहपूर्वक सम्पन्न गरेको छ। सो कार्यक्रमको अध्यक्षता जनस्वास्थ्य केन्द्रीय विभागका विभागीय प्रमुख श्री राजन पौडेलज्यूले गर्नुभएको थियो।
जनस्वास्थ्य केन्द्रीय विभागको सातौं वार्षिकोत्सव तथा विभागको आफ्नै जर्नल “नेपाल जर्नल अफ पब्लिक हेल्थ” को प्रथम वार्षिकोत्सवको अवसरमा “नेपालमा चिकित्सा तथा जनस्वास्थ्य शिक्षा : के हामी सही मार्गमा छौं ?” शीर्षकमा प्यानल छलफल आयोजना गरिएको थियो। यस छलफलमा चिकित्सा तथा जनस्वास्थ्य क्षेत्रका विज्ञहरु – चिकित्सा शिक्षा आयोगका निर्देशक प्रा.डा. सुजनबाबु मरहट्ठा, चिकित्सा शास्त्र अध्ययन संस्थानका डीन प्रा.डा. मोहनराज शर्मा, पाटन स्वास्थ्य विज्ञान प्रतिष्ठान सेवा आयोग अध्यक्ष प्रा.डा. केदार प्रसाद बराल, नेपाल मेडिकल काउन्सिलका अध्यक्ष प्रा.डा. चोपलाल भुसाल, नेपाल हेल्थ प्रोफेसनल काउन्सिलका अध्यक्ष श्री सुबोध कुमार शर्मा, नेपाल नर्सिंग काउन्सिलका अध्यक्ष प्रा. सरला केसी र स्वास्थ्य मन्त्रालय समन्वय महाशाखाका प्रमुख डा. भीम प्रसाद सापकोटा लगायत प्रतिष्ठित व्यक्तित्वहरूको उपस्थिति रहेको थियो।
छलफलमा शिक्षा प्रणालीको गुणस्तर, नीतिगत चुनौती र भावी दिशाबारे महत्त्वपूर्ण सुझावहरू प्रस्तुत गरिएको थियो। आयोजकहरूको भनाइमा, यस्तो कार्यक्रमले विद्यार्थी, शिक्षक र नीति निर्माताबीच संवादको पुल निर्माण गर्दै स्वास्थ्य शिक्षा सुधार, अनुसन्धान र अन्तर्राष्ट्रिय सहकार्यलाई थप सबल बनाउने विश्वास गरिएको छ। यस्ता Discourse का अन्य अंक आगामी दिनमा निरन्तर रूपमा भइरहने कुरा पनि बताउनुभयो।
विभागीय प्रमुख पौडेलले आफ्नो मन्तव्यमा विभागको प्रगतिबारे प्रकाश पार्दै अन्तर्राष्ट्रिय सहकार्य विस्तार भइरहेको उल्लेख गर्नुभयो। उहाँका अनुसार हाल तीन जना प्राध्यापक फिनल्यान्डको त्याम्पेरे विश्वविद्यालयमा PhD गर्दैछन् र सन् २०२६ का लागि थप अवसर सिर्जना भइसकेको छ। सो विश्वविद्यालयसँगको सहकार्यमा नेपालमा पाइने खाद्यान्न तथा खानेकुराको पोषण मूल्यको मानक निर्धारण गर्न तीन वर्षे परियोजना विभागमा सञ्चालनमा रहेको जानकारी पनि उहाँले दिनुभयो। त्यसैगरी, विभागमा PhD कार्यक्रम पुनः सञ्चालन, जनस्वास्थ्यमा M.Phil, Master in Applied Epidemiology, Master in Health Systems Management जस्ता नयाँ शैक्षिक कार्यक्रम प्रारम्भ गर्ने तयारी भइरहेको उहाँले बताउनुभयो।
त्यसै गरी University Grant Commission बाट केन्द्रीय विभागको Quality Assurance and Accreditation को लागि अबिलम्ब कार्य शुरु गर्ने, जनस्वास्थ्य केन्द्रीय विभागलाई Centre of Excellence for Public Health Education and Research बनाउने र नेपालमा विभागलाई विश्व स्वास्थ्य संगठनको Collaborative Center बनाउने कुरा बताउनुभयो l पुरानो पाठ्यक्रमलाई समयअनुकूल परिमार्जन गर्ने काम पनि अघि बढाइएका छन् भने विभागलाई हस्तान्तरण गरिएको नयाँ भवनमा मर्मत कार्य भइरहेको र निकट भविष्यमा विभाग त्यहाँबाट सञ्चालन हुने योजना रहेको उहाँले प्रष्ट पार्नुभयो।
सो अवसरमा यो वर्षका सेवा निवृत्त प्राध्यापकहरु, उत्कृष्ट कर्मचारीहरु तथा सर्बोत्क्रष्ट अंक ल्याउने विद्यार्थीहरुलाई कदर पत्र र नगद पुरस्कार सहित सम्मान गरिएको थियो l वार्षिकोत्सव अन्तर्गत सम्पन्न खेलकुद सप्ताहका विजेताहरूलाई पदक र प्रमाणपत्र प्रदान गरिएको थियो। साथै नयाँ भर्ना भएका विद्यार्थीलाई स्वागत र आफ्नो अध्ययन सकेर जाने विद्यार्थीलाई बिदाइ गरिँदा वातावरण उत्साहपूर्ण बनेको थियो।
