काठमाडौं, २६ चैत २०८१
स्वास्थ्यमन्त्री प्रदीप पौडेलले नेपालको स्वास्थ्य सेवा सबल बनाउनका लागि सहयोग गर्न अन्तर्राष्ट्रिय समुदायसँग आग्रह गरेका छन् ।
न्यूयोर्कस्थित संयुक्त राष्ट्रसंघको मुख्यालयमा आयोजित जनसंख्या तथा विकास आयोगको ५८औँ शत्रमा सम्बोधन गर्नै मन्त्री पौडेलले सहायताका लागि आह्वान गरेका हुन् ।
सम्बोधन गर्दै मन्त्री पौडेलले नेपालले पछिल्ला तीन दशकमा मातृ तथा सुत्केरीसँग सम्बन्धित मृत्युमा महत्वपूर्ण प्रगति हासिल गरेको अन्तर्राष्ट्रिय समुदायलाई जानकारी गराए । परिवार नियोजनका साधनको प्रयोगमा वृद्धि, प्रजनन क्षमता र किशोरावस्थाको जन्मदरमा कमी तथा बालविवाह घटाउन नेपाल सफल भएको पौडेलले बताए ।
मन्त्री पौडेलले नेपाल आफ्नो स्वास्थ्य प्रणाली सबल बनाएर हरेक नागरिकलाई स्वस्थ्य सुविधा प्रदान गर्न प्रतिवद्ध रहेको बताए। उनले भने, ‘तर यो हामी एक्लैले मात्र गर्न सम्भव छैन।’ अन्तर्राष्ट्रिय सहकार्य र ऐक्यबद्धताबाट मात्र यी कार्य सम्भव छन् ।
स्वास्थ्य क्षेत्रमा सीमित बजेट रहेको र नेपालको प्रतिव्यक्ति स्वास्थ्य खर्च विश्वव्यापी दरका तुलनामा कम भएको मन्त्री पौडेले सुनाए । ग्रामीण क्षेत्रमा पर्याप्त पूर्वाधार विकास तथा स्वास्थ्य संस्थाको कमी हुँदा नेपालीले स्वास्थ्य पहुँचमा कठिनाइ भोग्नुपरेको पौडेलको भनाइ छ ।
जलवायु परिवर्तनका कारण समेत नेपालको स्वास्थ्य क्षेत्रले समस्या बेहोर्नु परिरहेको उल्लेख गर्दै मन्त्री पौडेलले भने, ‘जलवायु परिवर्तन र प्राकृतिक प्रकोप बढ्दै जाँदा आपतकालीन अवस्थाको सामना गर्ने स्वास्थ्य प्रणालीको लचिलोपनलाई पहिले भन्दा बढी बलियो पार्न जरुरी छ।’
विकास सहायतामा कमीका कारण नेपालजस्ता देशले चुनौतीको सामना गर्नु परिरहेको उनले बताए । यो समस्या सम्बोधन गर्नका लागि हामी नेपाललाई विकास सहायता वृद्धिका लागि पौडेलले अन्तर्राष्ट्रिय समुदायलाई आग्रह गर्नुभयो ।
स्वास्थ्य सेवामा सर्वव्यापी पहुँचका लागि यो यस खालको सहायता जरुरी रहेको मन्त्री पौडेलले बताए । निजी क्षेत्रले समेत स्वस्थ्यमा लगानी वृद्धि गर्नु जरुरी रहेकोमा मन्त्री पौडेलले बताए।
मन्त्री पौडेल आजबाट पाँच दिनसम्म चल्ने सत्रमा नेपालको नेतृत्व गर्दै सहभागी छन् । न्यूयोर्कमा रहेर मन्त्री पौडेलले त्यहाँ रहेका नेपाली समुदायसँग स्वास्थ्य सेवा सुधारका लागि सुझाव संकलन गर्ने कार्यक्रम रहेको न्यूयोर्कस्थित राष्ट्रसंघका लागि नेपाली स्थायी नियोगका प्रमुख राजदुत लोकबहादुर थापाले जानकारी दिए।
