बाँके, १९ बैशाख २०८१
नेपालगञ्ज मेडिकल कलेजको अध्यक्षमा खुमा अर्याल सर्वसम्मत चयन भएका छन्।
मेडिकल व्यवसायी खुमा अर्यालले कलेजको मेजर सेयर खरिद गरेर मंगलबारबाट कलेजको अध्यक्षमा चयन भएका हुन्।
मंगलबार बसेको सञ्चालक समितिको बैठकले अर्याललाई सर्वसम्मत रुपमा अध्यक्षमा चयन गरेको हो। अर्यालको अध्यक्षतामा मेडिकल कलेजको थप विकास र विस्तार हुने सञ्चालक समितिले विश्वास लिएको छ।
अध्यक्ष अर्याल सहित कलेजको सञ्चालकहरुमा डा. सुरेशकुमार कनोडिया, दिनेश श्रेष्ठ, अनिज श्रेष्ठ, सन्तोष कनोडिया, सन्तोषकुमार खनाल, लोकहर्ष शाक्य, अजय गुप्ता र सन्दीप अग्रवाल रहेका छन्।
नवनियुक्त अध्यक्ष अर्यालले भने नेपालगन्ज मेडिकल कलेजलाई नयाँ योजनासाथ सञ्चालनमा ल्याउँदै थप उचाइमा पुर्याउने बताए। ‘विश्वबजारमा भित्रिएका नयाँ प्रविधि र उपचार विधिहरु मेडिकल कलेजमा ल्याएर सेवा विस्तार गर्दै नयाँ योजनासाथ कलेजको विकासमा लाग्नेछु।
अर्याल गण्डकी मेडिकल कलेजका अध्यक्ष हुन् भने युनिभर्सल कलेज अफ मेडिकल कलेजका प्रबन्ध सञ्चालक हुन्।
अर्यालले दाङमा पनि सञ्जीवनी अस्पताल स्थापनाको काम अगाडि बढाएका छन्। उक्त अस्पताललाई मेडिकल कलेजको रुपमा अगाडि बढाउने उनको लक्ष्य छ।
नेपालगञ्ज मेडिकल कलेजको नेपालगञ्जमा अस्पताल, कोहलपुरमा कलेज तथा अस्पताल र महेन्द्रनगरमा जग्गा रहेको छ।
