काठमाडौं, ७ बैशाख २०८२
नेपालमा पहिलो पटक चस्मा होलसेल व्यवसायी संघले चस्मा प्रदर्शन मेला शुरु गरेको छ । काठमाडौंको भृकुटीमण्डपमा शुरु भएको उक्त चस्मा प्रदर्शन मेला बैशाख ५ देखि ७ गते सम्म रहनेछ ।
देशभर छरिएर रहेका होलसेल तथा खुद्रा व्यवसायीसँगको एकआपसमा सुमधुर सम्बन्ध विस्तारसँगै व्यवसाय प्रवद्र्धन गर्ने उद्देश्यले पहिलो पटक चस्मा प्रदर्शन मेला आयोजना गरेको हो। 
प्रदर्शनी मेलाको उद्घाटन मातृका आँखा अस्पतालका डा. किशोर राज प्रधानले गरेका थिए। उद्घाटन कार्यक्रममा बोल्दै डा. प्रधानले प्रदर्शन मेलाको शुभकामनासँगै चस्मा व्यवसाय प्रवद्र्धनका लागि आफ्नो सधैं साथ र सहयोग रहने प्रतिबद्धता जनाएका छन् ।
चस्मा होलसेल व्यवसायी संघका अध्यक्ष सन्तोष दहालले स्वागत मन्तव्य राख्दै नेपालमा पहिलो पटक चस्मा प्रदर्शनी मेला आयोजना भएको जानकारी गराउँदै आगामी दिनममा यसलाई निरन्तरता दिइने जानकारी दिनुभयो। दहालले मेलाको उद्देश्य व्यवसायीहरु बीचको सम्बन्ध विस्तार र व्यवसाय प्रबर्द्धन गर्ने रहेको बताए ।
चस्मा होलसेल व्यवसायी संघका महासचिव छविलाल तिमल्सिनाले व्यवसायीहरुको एकआपसमा सम्बन्ध विस्तार गर्ने उद्देश्यले नै चस्मा प्रदर्शन मेला राखेको जानकारी दिनुभयो । तिमल्सेनाले पहिलो चस्मा प्रदर्शन मेला पहिलो पटक हो । अब हरेक वर्ष यसलाई निरन्तरता दिइने बताए । प्रदर्शन मेलामा विभिन्न राष्ट्रिय तथा अन्तर्राष्ट्रिय ब्राण्डका चस्मा राखेको उनले बताए।
नेपाली ब्राण्डमा एभरेष्ट, सिप्रो, सिएनपी कलेक्सन, गोर्खा, डिएभी लगायतका चस्मा रहेका छन् । अन्तर्राष्टिय ब्रान्ड Essilor Luxotica, Zeiss लगायतका चस्माहरु मेलामा छन् ।
महासचिव तिमल्सिनाका अनुसार प्रदर्शन मेलामा ४८ वटा चस्मा स्टल राखेका छन् । मेलाको अवलोकन होलसेल तथा खुद्रा चस्मा व्यवसायीहरुको मात्र गर्ने पाउनेछन् । करिब पाँच हजार जनाले मेलाको अवलोकन गर्ने अनुमान छ ।
तिमल्सिनाका अनुसार देशभर चस्मा होलसेल व्यवसायीहरु ६० वटा छन् भने खुद्रा व्यवसायीहरु करिब ५ हजार छन् । यस व्यवसायबाट प्रत्यक्ष तथा अप्रत्यक्ष रोजगारी पाउने करिब एक हजार बढी रहेका छन् ।
अध्यक्ष दाहालले व्यवसायहरु बीचको सुमधुर सम्बन्ध विस्तारका मेला आयोजना गरेको जानकारी दिए । दहालले हालसम्म चस्मा व्यवसाय सन्तोषजनक रहेको जानकारी दिए । पहिलो पटक चस्मा प्रदर्शन मेलाको अवसरमा आयोजक टिमलाई प्रशंसा पत्र समेत प्रदान गरेको छ । पहिलो पटक चस्मा प्रदर्शन मेला २०२५ सफल बनाउन महत्वपूर्ण भूमीका निर्वाह गरेको उच्च मूल्यांकन गर्दै आयोजक टिमलाई प्रशंसा पत्र प्रदान गरेको छ।
