सुर्खेत, २० जेठ २०८१
सुर्खेतको बिरेन्द्रनगरस्थित मेहेलकुना अस्पतालमा स्वास्थ्यकर्मीहरुमाथि भएको हातपात तथा अस्पतालमा भएको तोडफोडको विषयमा नेपाल चिकित्सक संघले गम्भीर ध्यानाकर्षण भएको जनाएको छ।
सर्पदंशबाट पीडित एक बालक उक्त अस्पतालबाट रिफर भई थप उपचारका लगि प्रदेश अस्पताल, सुर्खेत लाने क्रममा निधन भएको घटनामा उपचारमा असन्तुष्टी जनाउदै यही जेठ १२ गते मेहेलकुना अस्पतालका स्वास्थ्यकर्मीहरु माथि आफन्तले हातपात तथा अस्पतालमा तोडफोड गरेको घटना प्रति एनएमएको गम्भीर ध्यानाकर्षण भएको हो।
प्रेस विज्ञप्तिमा लेखिएको छ ‘सर्पदंशबाट पीडित एक बालकलाई प्राथमिक उपचार गरेर बिरामीका आफन्तलाई पछि आउन सक्ने जटिलताहरुको बारेमा जानकारी गराई थप उपचारका लागि प्रदेश अस्पताल, सुर्खेत रेफर गरिएकोमा बाटोमा लैजाँदै गर्दा उक्त बालकको मृत्यु भएको थियो। यसै विषयलाई लिएर अस्पताल जस्तो संवेदनशील क्षेत्रमा तोडफोड गर्ने तथा स्वास्थ्यकर्मीहरुमाथि हातपात गर्ने जस्ता अपराधिक कार्य गरेको घटनाको नेपाल चिकित्सक संघ घोर भत्सर्ना तथा निन्दा गर्दछ।’
संघले उपचारको क्रममा कुनै त्रुटी भएको शंका लागेमा कानूनी प्रक्रियामा जाने बाटो सबैका लगि खुलला भएको तर यस्ता धरपकडले स्वास्थ्य सेवा प्रवाहमा गम्भीर असर पुग्ने भन्नै स्वास्थ्य संस्था जस्तो संवेदनशील क्षेत्रलाई आतंकित पार्ने गरी घटाइएको अस्वाभाविक घटनामा संलग्न दोषीलाई कारवाहीको माग गरेको छ।
‘उपचारको क्रममा कुनै त्रुटी भएको शंका लागेमा कानूनी प्रक्रियामा जाने व्यवस्था हुँदाहुँदै स्वास्थ्यकर्मी र स्वास्थ्य संस्थामाथि नै आक्रमण गर्ने कार्यले स्वास्थ्यकर्मीहरुको मनोबलमा आँच आई स्वास्थ्य सेवा प्रवाहमा गम्भीर असर पुग्ने गरेको कुरा हामी सबैलाई अवगत नै छ।’ विज्ञप्तिमा भनिएको छ।
चिकित्सक संघले भनेको छ “स्वास्थ्यकर्मी तथा स्वास्थ्य संस्थाको सुरक्षा सम्बन्धि ऐन २०६६ (पहिलो संशोधन), २०७९” बमोजिम कानूनी कारवाही गरी सुरक्षित र भयरहित वातावरणमा स्वास्थ्य सेवा प्रवाह गर्ने व्यवस्था मिलाउन नेपाल चिकित्सक संघ जोडदार माग गर्दछ।’
स्वास्थ्य संस्था जस्तो संवेदनशील क्षेत्रलाई आतंकित पार्ने गरी घटाइएको अस्वाभाविक घटनामा संलग्न दोषीहरु अस्पतालको सिसिटिभी क्यामरामा कैद भएकाले सो को अविलम्ब पहिचान गरी दोषीलाई कानूनको दायरामा ल्याई कानुन बमोजिम कडा कारवाहीको माग गरेको छ।
