चितवन, १९ चैत २०८१
भरतपुरस्थित मौलाकालिका अस्पताल प्रा.लि.ले स्वास्थ्यलाई प्राथमिकता दिँदै चितवन जिल्लाभरका ट्राफिक प्रहरीका लागि विशेष निःशुल्क स्वास्थ्य परीक्षण सम्पन्न गरेको छ ।
चितवन जिल्लामा क्रियाशील सम्पूर्ण ट्राफिक प्रहरीहरूको स्वास्थ्य अवस्थाको मूल्यांकन गर्दै रोगहरूको प्रारम्भिक पहिचान तथा रोकथामका लागि २ दिने कार्यक्रम आयोजना गरिएको हो । जिल्ला ट्राफिक प्रहरी कार्यालय चितवनको समन्वयमा कार्यक्रम भएको हो ।
कार्यक्रममा ट्राफिक प्रहरीको विशेषज्ञ डाक्टरहरूले व्यक्तिगत स्वास्थ्य अवस्थाका बारेमा विस्तृत परामर्श दिनुको साथै मुटुको जाँच, मुटुसम्बन्धी समस्याको पहिचान गर्न विभिन्न परीक्षण गरिएको थियो । यसैगरी रगत परीक्षण गरी विभिन्न गरी रगतमा हुने विभिन्न तत्वहरुको मापदन गरिनेका साथै मूत्र प्रणालीको अवस्था, मृर्गाैला परीक्षण समेत गरिएको अस्पतालले जनाएको छ ।
जाँचका क्रममा अधिकांश ट्राफिक प्रहरीहरूको स्वास्थ्य अवस्था सामान्य रहेको पाईएको अस्पतालका निर्देशक एवम् वरिष्ठ रेडियोलोजी डा. रमेश घिमिरेले बताउनुभयो ।
डा. घिमिरेले केही प्रहरीमा कलेजोमा बोसो जमेको मिर्गौलामा पत्थरीको समस्या देखापरेको बताए । थकान, उच्च रक्तचाप र पाचन सम्बन्धी केही समस्या पहिचान गरिएको उहाँले बताउनुभयो ।
स्वास्थ्य क्षेत्रमा निरन्तर सेवा प्रवाह गर्दै आएको मौलाकालिका अस्पतालले यस किसिमका सामाजिक क्रियाकलापहरूलाई विशेष प्राथमिकता दिँदै आएको डा. घिमिरेको भनाई छ । डा. घिमिरेले भन्नुभयो “समुदायको स्वास्थ्य सुरक्षालाई मध्यनजर गर्दै विभिन्न सामाजिक स्वास्थ्य शिविर, निःशुल्क परीक्षण कार्यक्रम तथा जनचेतनामूलक गतिविधिहरू निरन्तर गर्दै आईरहेका छौं ।
स्वास्थ्य क्षेत्रको अग्रणी संस्थाका रूपमा मौलाकालिका अस्पतालले समाजप्रति आफ्नो दायित्वलाई सधैं जिम्मेवारीपूर्वक निर्वाह गर्दै आएको बताउँदै उहाँले भविष्यमा पनि यस्ता निःशुल्क शिविरहरूको आयोजना गरी सर्वसाधारण र सेवाप्रदायक निकायहरूको स्वास्थ्य सुरक्षामा योगदान गर्ने प्रतिबद्धता व्यक्त गर्नुभयो ।
स्वास्थ्य परीक्षणमा सहभागी ट्राफिक प्रहरीहरूले अस्पतालको यो प्रयासको खुलेर प्रशंसा गर्दै आफ्नो स्वास्थ्य अवस्थाको जानकारी पाउँदा आत्मविश्वास बढेको प्रतिक्रिया दिनुभयो । “यस्तो निःशुल्क स्वास्थ्य जाँचले हामीलाई समयमै स्वास्थ्य समस्याको पहिचान गर्न मद्दत पुगेको छ । मौलाकालिका अस्पतालको यस सेवाका लागि हामी आभारी छौँ ।” एक जना ट्राफिक प्रहरी जवानले भन्नुभयो ।
भरतपुरको एयरपोर्ट चोक नजिक रहेको अस्पताल हाल मालपोत चोक नजिकै वाईपास रोडमा रहेको छ । अस्पतालले समुदायलाई आफ्नो स्वास्थ्यप्रति सजग रहन र नियमित जाँच गर्न प्रेरित गर्दै स्वास्थ्य सचेतनामा विशेष जोड दिएको निर्देशक घिमिरे बताउनुहुन्छ । यस प्रकारका निःशुल्क स्वास्थ्य शिविरहरूले स्वास्थ्य सेवामा पहुँच विस्तार गर्न महत्वपूर्ण भूमिका खेल्ने उहाँको विश्वास छ । अस्पतालले नयाँ भवनमा सरेको अवसरमा विभिन्न सेवामा छुट दिंदै आएको छ ।
