भक्तपुर, २९ असार २०८२
काठमाडौं क्यान्सर सेन्टरमा हाइपरथर्मिक इन्ट्रापेरिटोनियल केमोथेरापी सर्जरी सुरु भएको छ।
डा. दीप लामिछाने, डा. सुरेश कायस्थ र डा. सुरज सुवालको टोलीले काठमाडौं क्यान्सर सेन्टरबाट उक्त सेवा दिन थालेको हो।
यो विशेष उपचार विधिमा पेटभित्रको क्यान्सरलाई हटाउन साइट्रोरिडक्टिभ सर्जरी गरिएको छ र त्यसपछि तताएको (लगभग ४२°सी) केमोथेरापी सिधै पेटभित्र प्रवाह गरिएको छ।
डा. दीप लामिछानेको नेतृत्वमा यो उपचार निजी क्षेत्रमा ल्याउने प्रयास गरेको हो। नेपालका क्यान्सर रोगीहरूलाई देशभित्रै उन्नत उपचार पाउने अवसर प्रदान गर्ने सेन्टरले बिश्वास लिएको छ।
क्यान्सर फैलिसकेर चौथो चरणमा पुगिसकेका बिरामीहरुका लागि शल्यक्रिया गरेर क्यान्सरको सम्पूर्ण कोषिका निकाल्ने तथा शल्यक्रियाकै क्रममा पेट भित्र केमोथेरापी दिने क्रममा प्रयोग हुने प्रविधि नै हाइपेक हो।
डा. दीप लामिछानेले यो प्रविधिको प्रयोग डिम्वाशयको क्यान्सर भएका, ठूलो आन्द्राको क्यान्सर, सानो आन्द्राको क्यान्सर, रेक्टम (दिसा गर्ने अन्तिम भाग) को क्यान्सर लगायतमा यस प्रविधिको प्रयोग हुने गरेको बताए।
चौथो चरणमा पुगेका सबै क्यान्सरका बिरामीहरु प्रयोग हुने प्रविधि नभएको डा. लामिछानेले स्पष्ट पारे। बिरामीको रोगको अवस्था अनुसार उक्त विधिको प्रयोग फाइदाजनक भए/नभएको निक्र्याैल गरेर मात्र यो विधि प्रयोग गरिन्छ। हाइपेक प्रविधिको पढाइ नेपालमा हुँदैन। यसको प्रयोग भइरहेका विदेशी अस्पतालहरुमा तालिम लिनुपर्ने हुन्छ डा. लामिछानेले भने।
विश्वमा यस प्रविधिको प्रयोग सन् २००३ देखि व्यापक भएको हो । यद्यपि सन् १९८० देखि नै यस प्रविधिको महत्वबारे छलफल भएको थियो।
क्यान्सरको उपचारका क्रममा दिइने केमोथेरापीले पूर्ण रुपमा निको पार्न नसकेको क्यान्सरका कोषहरु यो प्रविधिले निको पार्ने दाबी चिकित्सकहरुको छ। क्यान्सर शल्यक्रिया गरिसकेपछि त्यसलाई नियन्त्रण गर्ने औषधिको प्रयोग यस प्रविधिमा हुन्छ।
