भक्तपुर, २३ चैत्र २०८०
भक्तपुरको ताथली स्थित रहेको काठमाडौं क्यान्सर सेन्टरमा क्यान्सर रिहबिलिटेसन एण्ड फिजियोथेरापी सेवा सुरु गरिएको छ।
सेन्टरमा ओपिडी र इन्प्याटेन्ट सेवा प्रदान गरिनेछ। जसमा जनरल फिजियोथेरापी बाहेक विशेष क्यान्सरका बिरामीहरुलाई प्रि- रिहबिलिटेसन र रिहबिलिटेसन सेवा प्रदान गरिने भएको छ।
त्यस्तैगरी क्यान्सरको बिरामीलाई अति आवश्यक उपचार लिम्फ्याटिक ड्रेनेज जस्ता उपचार पद्धति आधुनिक उपकरण द्वारा उपलब्ध गराइनेछ।
क्यान्सरको उपचारले जुन शारीरिक र मानसिक विकार गर्छ त्यसबाट जोगिन र बिरामीको क्वालिटी अफ लाइफ राम्रो बनाउनको लागि क्यान्सर रिहबिलिटेसनले महत्त्वपूर्ण भूमिका खेल्छ।
क्यान्सर रिहबिलिटेसनको महत्त्व नेपाली जनमानसमा कम भएको कारण र यसको सुविधाको कमी भएकोले काठमाडौँ क्यान्सर सेन्टरले यसको महत्वलाई बुझेर दक्ष जनशक्ति र आधुनिक प्रविधि सहितको फिजियोथेरापी र रिहबिलिटेसन डिपार्टमेन्टको सुरुवात गरेको हो।
