काठमाडौं, ३० माघ २०८१
प्रधानमन्त्री केपी शर्मा ओलीले पाठेघरको मुखको क्यान्सरविरूद्धको एचपीभी खोप १० लाखभन्दा बढी किशोरीले लगाउन सफल भएकोमा सबै निकायलाई धन्यवाद व्यक्त गरेका छन् ।
सामाजिक सञ्जालमा लेख्दै ओलीले खोप लगाउन यस अभियानमा संलग्न भएका व्यवस्थापक, स्वास्थ्यकर्मी, स्वयंसेवक, शिक्षक, अभिभावक तथा सरकारी तथा गैरसरकारी सबै निकायलाई धन्यवाद दिएका छन् ।
‘माघ २२ गतेदेखि सुरू भएको देशव्यापी एचपीभी खोप अभियान उत्साहका साथ सञ्चालन भइरहेको छ। हालसम्म १० लाख किशोरीले यो खोप लिइसकेका छन्। खोप अभियान फागुन ६ गतेसम्म चल्ने छ’, ।
स्वास्थ्य सेवा विभागका बालस्वास्थ्य तथा खोप शाखा प्रमुख डा. अभियान गौतमका अनुसार खोप सञ्चालन भएको छैटौँ दिनमा माघ २८ गते सम्म १० लाख १६ हजार सात सय ७१ किशोरीले खोप लगाएका छन्। यो समग्रमा ६० दशमलव ६५ प्रतिशत हो। १६ लाख ७६ हजार चार सय ५२ मध्ये १० लाख १६ हजार सात सय ७१ जना किशोरीले खोप लगाएका हुन्। उनले खोप कार्यक्रम सबैको सहयोगले सफल रूपमा चलिरहेको छ।
शनिबार विद्यालय बन्द हुनाले खोप अभियान सञ्चालन गरिएको थिएन। डा. गौतमका अनुसार कोशीमा एक लाख ८१ हजार ५० जना, मधेसमा एक लाख ४८ हजार ५६ जना, बागमतीमा एक लाख ९६ हजार ७४ जना, गण्डकीमा ८६ हजार एक सय १२ जना, लुम्बिनीमा एक लाख ८९ हजार आठ सय ७७ जना, कर्णालीमा ८२ हजार सात सय ९८ जना र सुदूरपश्चिममा एक लाख ३२ हजार आठ सय चार जना किशोरीले खोप लगाएका छन्।
शाखा प्रमुख डा. गौतमले छ दिनको सफलता लक्ष्यअनुसार सबै किशोरीलाई खोप लगाइने जानकारी दिनुभयो। सरकारले किशोरीलाई पाठेघरको मुखको क्यान्सरबाट बचाउनका सञ्चालन गरेको खोप अभियानमा कक्षा ६ देखि १० सम्म र विद्यालय बाहिर रहेका १० देखि १४ वर्ष उमेर समूहका सहभागी हुँदै छन्।
