काठमाडौं, २६ चैत २०८१
धुम्बराहीस्थित रहेको हस्पिटल फर एड्भान्स्ड मेडिसिन एण्ड सर्जरी (ह्याम्स) अस्पतालले आफ्नो वार्षिकोत्सवको अवसरमा ‘गुणस्तरीय स्वास्थ्य सेवामा पहँच’ र ‘नागरिकको स्वास्थ्यमा लगानी’ का विषयमा वहस तथा छलफाल गर्ने भएको छ।
ह्याम्स अस्पतालले आफ्नो वार्षिकोत्सवको अवसरमा ‘संवाद श्रृङ्खला -२’मा ‘गुणस्तरीय स्वास्थ्य सेवामा पहँच’ र ‘नागरिकको स्वास्थ्यमा लगानी’ का विषयमा संवाद तथा छलफल कार्यक्रम आयोजना गर्ने भएको हो।
अस्पतालले अघिल्लो वर्ष वार्षिकोत्सवको अवसरमा बृहत सामाजिक हितको लागि “स्वास्थ्य सवैको सरोकार” भन्ने नारा सहित ‘संवाद श्रृङ्खला–१’को आयोजना गरेको थियो।
ह्याम्स अस्पतालका अध्यक्ष रामशरण भण्डारीले नेपाली आम जनमानस प्रतिको सामाजिक उत्तरदायित्व बोध गर्दै प्रत्येक वर्ष अस्पतालको वार्षिकोत्सवको अवसरमा बृहत सामाजिक हितको लागि “स्वास्थ्य सवैको सरोकार” भन्ने नारा सहित संवाद तथा छलफल कार्यक्रम आयोजना गर्ने निर्णय गरेको बताउनुभयो।
भण्डारीले भने ‘आजको दिनमा मुलुकको स्वास्थ्य क्षेत्रमा विभिन्न समस्या तथा चुनौतीहरु विद्यमान रहेका र जनस्वास्थ्य संग प्रत्यक्ष सरोकार राख्ने विभिन्न समस्याहरुको बारेमा बृहत छलफल तथा बहस आवश्यक महसुश गरि ह्याम्स अस्पतालले विगतको बर्षमा झै यही २०८१ साल चैत्र २९ गते “संवाद श्रृङ्खला–२” संचालन गर्न लागेको हो।’
तीन सत्रमा विभाजित कार्यक्रममा नागरिकको स्वास्थ्य संग सम्वन्धित निम्न विषयमा बृहत छलफल गरी समाधानका लागि निष्कर्ष तथा सुझाव निकाल्ने उद्देश्य सहित सम्वन्धित क्षेत्रका विज्ञ, सरोकारवाला निकाय तथा प्रतिनिधिसभा सांसदहरु सम्मिलित संवाद कार्यक्रम आयोजना गर्न लागिएको हो।
पहिलो सत्रमा ‘गुणस्तरीय स्वास्थ्य सेवामा पहँच’ शिर्षकको प्यानल संवाद गरिने छ जसमा नेपाली कांग्रेसमा महामन्त्री तथा प्रतिनिधि सभाका सांसद गगन थापा, नेकपा माओवादीका तर्फाबाट प्रतिनिधि सभाका सांसद देवेन्द्र पौडेल, स्वास्थ्य तथा जनसंख्या मन्त्रालयका सचिव डा. विकास देवकोटा, वरिष्ठ मुटु रोग विशेषज्ञ प्राडा. भगवान कोइराला, नेपाल नर्सिङ्ग काउन्सिलका अध्यक्ष प्रा. सरला के. सी., अफिनका अध्यक्ष डा. पदम बहादुर खड्का, म्याक्स हस्पिटल, नयाँ दिल्लीका कार्यकारी भाइस प्रसिडेन्ट डा. गुरिप्रत सिंह रहने छन्। 
कार्यक्रमको दोस्रो सत्रमा ‘नागरिकको स्वास्थ्यमा लगानी’ शिर्षकको प्यानल संवाद गरिने छ जसमा नेकपा एमालेका तर्फबाट प्रतिनिधि सभाका संसद पदम गिरी, राष्ट्रिय स्वतन्त्र पार्टीका तर्फाबाट प्रतिनिधि सभाकी सांसद सोविता गौतम, स्वास्थ्य बिमा बोर्डका कार्यकारी निर्देशक डा. रघुराज काफ्ले, स्वास्थ्य तथा जनसंख्या मन्त्रालयका सह सचिव डा. कृष्ण पौडेल, स्वास्थ्य अर्थ विज्ञ डा. सुरेश तिवारी तथा शिखर इन्स्योरेन्सका प्रमुख कार्यकारी अधिकृत दिप पाण्डे प्यानलिस्टका रुपमा रहने छन्।
कार्यक्रमको तेस्रो सत्रमा पहिलो दुई सत्रको सारंश तथा उप–प्रधान तथा शहरी विकास मन्त्री प्रकाशमान सिंहको मन्तव्य सहित समापन हुने कार्यक्रम तय गरिएको छ।
भण्डारीले यस संवाद कार्यक्रमबाट छलफलका क्रममा आएका सुझावहरु लिपिबद्ध गरी स्वास्थ्य तथा जनसंख्या मन्त्रालयमा आवश्यक कायार्थ पेश गरिने तथा प्रत्येक वर्ष यस्ता संवाद कार्यक्रम नियमित रुपमा संचालन गर्ने जानकारी दिए।
