सिन्धुपाल्चोक, ५ पुष २०८१
सिन्धुपाल्चोकको पाँचपोखरी थाङपाल गाउँपालिकामा दुई दिन सम्म चलेको स्वास्थ्य शिविरबाट ५ हजार ३ सय ५१ जनाले सेवा लिएका छन्।
जिल्ला जनस्वास्थ्य कार्यालयद्वारा पाँचपोखरी थाङपाल गाउँपालिकाको समन्वयमा आयोजित शिविरमा विशेषज्ञ चिकित्सकसहितको स्वास्थ्यकर्मीहरूले सामान्य चिकित्सा, बालरोग, नाक, कान, घाँटी, आँखा, दाँत, मुख, स्त्री तथा प्रसूति सम्बन्धि उपचार र परामर्श सेवा प्रवाह गरेका थिए। 
एकीकृत जनस्वास्थ्य तथा पोषण प्रवर्द्धन अभियान २०८१ अन्तर्गत सेवा प्रवाह गरिएको जनस्वास्थ्य कार्यालय सिन्धुपाल्चोककी प्रमुख दुर्गा बजगाईंले बताइन् । पाँचपोखरी थाङ्पाल गाउँपालिकाको वडा नं. ६ धाप र वडा नं. ७ भोटेनाम्लाङमा शिविर सञ्चालन गरिएको थियो।
शिविरको उद्घाटन बागमती प्रदेशका स्वास्थ्य मन्त्री किरण थापाले गरेका थिए। प्रदेश भित्रका विकट र दुर्गम स्थानहरूमा पुगेर स्वास्थ्य सेवा प्रदान गर्ने कार्यमा स्वास्थ्य मन्त्रालय लागेको छ। प्रदेश सरकारले सुगममा मात्र नभएर दुर्गममा पनि स्वास्थ्य सेवाको पहुँचमा सबै नागरिकलाई पुर्याउने उद्देश्य राख्दै विभिन्न माध्यमबाट सेवा प्रदान गर्दै आइरहेको मन्त्री थापाले बताए।
मन्त्री थापाले गाउँको नागरिकहरूको स्वास्थ्य अवस्था कस्तो छ र आगामी दिनमा मन्त्रालयले कस्ता कार्यक्रमलाई प्राथमिकता दिने भन्ने विषयमा अध्ययन गर्न पनि आफू स्वयम् प्रदेश भित्रको विभिन्न टोल बस्तीमा पुग्ने गरेको बताए।
बागमती प्रदेशको स्वास्थ्य मन्त्रालयका चिकित्सा सेवा महाशाखाका प्रमुख डा. खगेश्वर गेलालले शिविरमा बागमती प्रदेश भित्र एउटा मात्रै रहेको अल्ट्रा प्रोटेबल एक्स–रे मेसिनबाट समेत सेवा दिईएको बताए। एआई प्रविधि युक्त मेसिनबाट विशेषगरी क्षयरोग सम्बन्धी परीक्षण गरिएको डा. गेलालले बताए।
भौगोलिक विकटता र आर्थिक अभावका कारण शहर बजारका स्वास्थ्य संस्थामा पुगेर सेवा लिन नसकेका नागरिकहरूको सुविधाका लागि शिविरले फाइदा पुर्याएको गाउँपालिकाका टासी लामाले बताए। ग्रामीण भेग र आर्थिक अभावका कारण अस्पताल जान नसकेका बिरामीले शिविरको प्रत्यक्ष लाभ लिएको गाउँपालिकाले जनाएको छ।
