जनकपुर, १८ साउन २०८२
डा. रञ्जित झाले हवाई उडानकै क्रममा आपतमा परेका एक नवजात शिशुको ज्यान बचाएका छन्।
जनकपुरबाट काठमाडौंका लागि उडेको यती एयरलाइन्सको विमानमा रहेका शिशुमा अचानक गम्भीर स्वास्थ्य समस्या देखिएपछि डा. झाले तत्काल प्राथमिक उपचार गरी संकट टारेका हुन्।
उडानको क्रममा अक्सिजनको कमी भएपछि जन्मजात मुटुरोग कन्जेनिटल हार्ट डिजिजबाट पीडित शिशुको शरीर निलो हुन थालेको थियो।
सोही विमानमा यात्रा गरिरहेका लहान प्रादेशिक अस्पतालका मेडिकल सुपरीटेन्डेन्ट (प्रमुख) समेत रहेका डा. झाले तत्काल सक्रिय भइ प्राथमिक उपचार मार्फत ज्यान जोगाएका हुन।
डा. झाले भने ‘यात्राकै क्रममा शिशुको शरीर निलो हुन थाल्यो। एयरलाइन्सका कर्मचारीले सहयोग मागे। भाग्यवश जहाजमै थिए यसो हेर्दा अक्सिजन मिटर लगाउनु पर्ने थियो र अभिभावकलाई मानसिक सान्त्वना दिँदै अस्पतालसम्म सुरक्षित पुर्याउन सुझाब दिए।
जहाज अवतरण हुनासाथ डा. झाले त्रिभुवन विमानस्थलमै एम्बुलेन्सको व्यवस्था गरी शिशुलाई तुरुन्तै अस्पताल पुर्याउन समन्वयसमेत गरेका थिए।
डा. झा चिकित्सा र गायन दुबै क्षेत्रमा परिचित नाम हुन्। बंगलादेशबाट एमबीबीएस, त्रिवि शिक्षण अस्पतालबाट एमडी मेडिसिन, भारतको दिल्लीस्थित अपोलो अस्पतालबाट डाइबेटिज, कार्डियोलोजी तथा आईसीयू मेडिसिनमा फेलोसिप गरेका डा. झा चिकित्सा क्षेत्रमा झन्डै दुई दशकदेखि सक्रिय छन्।
वीर अस्पतालमा कन्सलटेन्ट सिनियर फिजिसियन, गणेशमान सिंह अस्पताल महालक्ष्मीस्थान र शिवज्योति अस्पताल बल्खुको ओपीडीदेखि आईसीयुसम्मको सेवा दिइसकेका उनी गजेन्द्र नारायण सिंह, लहान प्रादेशिक अस्पताल र जिरी अस्पताल दोलखाको प्रमुख थिए भने हाल लहान प्रादेशिक अस्पतालको प्रमुखका रूपमा कार्यरत छन्।
यस घटनाले डा. झाले चिकित्सकीय सीप र मानवीेयता दुवैलाई सही समयमा प्रयोग गरेर संकटमा परेका एक शिशुको जीवन जोगाएको प्रेरणादायक उदाहरण पेश गरेको छ।
