काठमाडौं, २४ भदौ २०८२
हैजा प्रभावित क्षेत्रका लागि विश्व स्वास्थ्य संगठनले कोलेरा किट प्रदान गरेको छ। स्वास्थ्य तथा जनसङ्ख्या मन्त्री माननीय प्रदीप पौडेलको उपस्थितिमा सोमबार मन्त्रालयमा आयोजित एक कार्यक्रमकाबीच कोलेरा किट हस्तान्तरण गरिएको छ।
देशका विभिन्न स्थानहरुमा हैजाको प्रकोप देखिएसँगै यसको रोकथाम, नियन्त्रण र उपचारलाई प्रभावकारी बनाउन उक्त सामग्री हस्तान्तरण गरिएको हो।
स्वास्थ्यमन्त्री पौडेलले हैजाको प्रकोप देखिएका स्थानहरूमा स्वास्थ्यकर्मीको टोली परिचालन गरिरहेको र थप स्वास्थ्य सहायता उपलब्ध गराउन मन्त्रालयले तीव्र रुपमा कार्य गरिरहेको दाबी गरेका छन्।
‘हैजाको प्रकोप देखिएका स्थानहरूमा हामीले तत्कालै विशेषज्ञ स्वास्थ्यकर्मीहरूको टोली परिचालन गरिसकेका छौं,’ पौडेलले भने, ‘हैजा प्रभावित क्षेत्रको अवस्थाका बारेमा निरन्तर अनुगमन भइरहेको र आवश्यकता अनुसार थप स्रोतसाधन परिचालन गर्न मन्त्रालय तयारी अवस्थामा रहेको छ।’
कार्यक्रममा हस्तान्तरण गरिएका कोलेरा किटमा हैजाको प्रारम्भिक निदान, नियन्त्रण र उपचारका लागि आवश्यक रिएजेन्ट्स, पुनर्जलीय झोल, आई भी फ्ल्युड्स, एन्टिबायोटिक लगायतका ८७ प्रकारका स्वास्थ्य सामग्री समावेश छन्।
विश्व स्वास्थ्य संगठनबाट प्राप्त भएका किटलाई मन्त्रालय अन्तर्गतको स्वास्थ्य सेवा विभागमार्फत हैजा प्रभावित जिल्लाका अस्पताल, स्वास्थ्य कार्यालय तथा स्थानीय तहमा तुरुन्तै पठाउने व्यवस्था मिलाइएको छ।
