काठमाडौं, १६ असोज२०८२
वीर अस्पतालमा न्युरोसर्जरी विभाग प्रमुख प्रोफेसर डा. राजीव झाको नेतृत्वमा एक बिरामीको मस्तिष्कमा भएका ६ वटा धमनी मध्ये एक फुटेको अवस्थामा एक पटकमा शल्यक्रिया गरिएको छ। उक्त जटिल शल्यक्रिया गर्न करिब नौ घण्टा लामो समय लागेको थियो ।
प्रोफेसर डा. राजीव झा सङ्गै टिममा डा. अन्जन सिंह कार्की र डा. मदन बजगाईँ (न्युरोसर्जन), डा. प्रदीप वैद्य र डा. अनुज जंग कार्की (एनेस्थेसिया टोली) र नर्स सिन्धु गौतम तथा अस्मिता कार्की सहितको टोलीको संयुक्त प्रयासबाट शल्यक्रिया सफल भएको अस्पतालका न्युरोसर्जरी विभागीय प्रमुख डा. राजीब झाले बताउनुभयो ।
उक्त शल्यक्रियाको क्रममा पाँच धमनीलाई क्लिप लगाएर बन्द गरिएको थियो भने एउटा धमनीलाई विशेष कपडा (निर्मलीकरण गरिएको) ले बेरेर सुरक्षित राखिएको डा. झाले बताए। सामान्यतया एउटै व्यक्तिमा धेरैवटा एनोरिजम भएको अवस्थामा अलग–अलग शल्यक्रिया गरिन्छ । तर यो केसमा भने मस्तिष्कको एकापट्टि (बायाँपट्टि) बाट मस्तिष्कको अन्य भागहरूमा भएका एनोरिजमलाई उपचार गर्न सकिएको थियो, जसमा अर्कोपट्टिका एनोरिजमहरू समेत मस्तिष्कको एकै ठाउँ (बायाँ) बाटै एकै पटकको शल्यक्रियाबाट सुरक्षित गरिएको थियो ।
अप्रेसनपछि बिरामीको स्वास्थ्य स्थिति सुधार भएको छ । उनी केही समयपछि घर फर्कन सक्ने बताइएको छ ।
