काठमाडौं, ०८ साउन २०८२
स्वास्थ्य तथा जनसंख्या मन्त्री प्रदीप पौडेलले वीर अस्पतालको आपत्कालीन सेवामा ७२ वटा अतिरिक्त शैया थपिने योजना भएको बताएका छ्न।
सोमबार स्वास्थ्यमन्त्री पौडेलले एक वर्षे कार्यकालको प्रतिबेदन प्रस्तुत गर्ने क्रममा वीर अस्पतालको सेवालाई अझ प्रभावकारी बनाउने उद्देश्यले आपत्कालीन कक्ष विस्तार गर्न लागिएको बताएका हुन।
मन्त्री पौडेलले भने, “वीर अस्पतालको व्यवस्थापन सुधार्न ७२ शय्याको इमर्जेन्सी यूनिट थप्ने योजना अघि बढाइएको छ। यसका लागि आवश्यक बजेट सुनिश्चित भइसकेको छ।”
मन्त्री पौडेलले डा. मदन उपाध्यायको संयोजकत्वमा गठन गरिएको समितिले तयार पारेको सुझावको आधारमा काम भइरहेको उल्लेख गर्नुभयो।
पौडेलले आर्थिक रुपमा कमजोर नागरिकलाई लक्षित गर्दै स्वास्थ्य बिमा कार्यक्रममा जोड्ने तयारी भइरहेको जानकारी दिनुभयो। आठवटा गम्भीर रोगको उपचारमा बिमा सुविधा पुर्याउने योजना समेत अघि बढाइएको पनि उनले बताए।
मन्त्री पौडेलले दीर्घकालीन योजनाहरूका लागि बजेट सुनिश्चित गरिएको र संघ, प्रदेश तथा स्थानीय तहबीच समन्वय स्थापना भइसकेको बताउनुभयो।
डेंगी नियन्त्रण, एचपीभी खोप कार्यक्रमको सफलता, जनस्वास्थ्य समिति गठन, विद्यालय नर्स कार्यक्रम सुरु, र महामारीका लागि पूर्वतयारी गरिएको उहाँले उल्लेख गर्नुभयो। साथै, योग तथा ध्यान कार्यक्रम देशभरका स्थानीय तहमा पुर्याइएको र स्वास्थ्य बिमा कार्यक्रम सुरु भइसकेको जानकारी पनि दिनुभयो।
प्राविधिक उपकरणका क्षेत्रमा एमआरआई, सिटि स्क्यान र क्याथ ल्याबका लागि पर्याप्त बजेट विनियोजन गरिएको छ। त्यस्तै, सुर्तीजन्य पदार्थ नियन्त्रणका लागि सबै प्याकेटमा चेतावनी सन्देश छापिने निर्णय गरिएको छ।
मन्त्री पौडेलले हालसम्म ११३ वटा आधारभूत अस्पताल निर्माण सम्पन्न भइसकेका छन्, भने थप ५५ वटा अस्पताल सञ्चालनका लागि तयारी अवस्थामा छन्। चालु आर्थिक वर्षमा १३७ नयाँ अस्पताल निर्माणाधीन अवस्थामा रहेका छन्, र यो संख्या बढेर कुल २५० पुग्नेछ। यस कार्यका लागि सरकारले ११ अर्ब रुपैयाँको बजेट विनियोजन गरिसकेको छ।
त्यसैगरी, अङ्ग दान प्रणालीलाई प्रविधिमैत्री बनाउँदै अनलाइन माध्यमबाट प्रक्रिया सुरु गरिएको छ। मस्तिष्क मृत्यु पश्चात् अङ्ग दान गर्ने परिवारलाई दिइने प्रोत्साहन रकम दोब्बर पारेर दुई लाख पुर्याइएको समेत मन्त्री पौडेलले जानकारी दिनुभयो।
