काठमाडौं, २९ मंसिर २०८२
नर्सको माग सम्बोधन गर्न बनेको कार्यदलले तयार गरेको प्रतिवेदन स्वास्थ्य तथा जनसंख्या मन्त्री डा. सुधा शर्मालाई बुझाएको छ ।
सोमबार नर्स तथा स्वास्थ्यकर्मीको न्यूनतम पारिश्रमिक तथा सेवा सुविधाहरु सम्बन्धी मागको सम्बोधनका लागि गठित कार्यदलले प्रतिवेदन बुझाएको हो । स्वास्थ्य तथा जनसंख्या मन्त्रालयका अतिरिक्त सचिव डा. श्रीकृष्ण श्रेष्ठको संयोजकत्वमा कार्यदल गठन भएको थियो ।
निजी तथा सामुदायिक अस्पताल एवं संस्थाहरुमा कार्यरत नर्सिङ र स्वास्थ्यकर्मीहरुको मर्यादित श्रम तथा सुविधाका सम्बन्धमा सरकारी सरह न्यूनतम तलब भत्ता प्रदान गर्न पटक पटक भएका निर्देशन, परिपत्रहरुको हालसम्म कार्यान्वयन नभएकाले यथाशिघ्र कार्यान्वयन गर्न सहमति कायम गर्ने प्रतिवेदनको उद्देश्य रहेको छ।
यस किसिमको समस्याहरु बारम्बार आइरहेको परिप्रेक्ष्यमा दीर्घकालीन रुपमा समस्याको समाधान गर्न सरकार र सम्बन्धित मन्त्रालयहरुले गर्नुपर्ने कार्यको लागि समेत राय सुझाव र कार्य योजना प्रतिवेदन पेश गर्ने विषयमा उल्लेख गरिएका छन्।
निजी मेडिकल कलेज, डेन्टल कलेज तथा अस्पतालहरुमा कार्यरत नर्स तथा स्वास्थ्यकर्मीको सेवा सुविधा, सहज व्यावसायिक वातावरणका सम्बन्धमा पनि प्रतिवेदनमा उल्लेख गरिएका छन्।
स्वास्थ्य मन्त्रालयले निर्देशन गरे अनुरुपको सेवा सुविधाको माग गर्दै पोखराको मणिपाल मेडिकल कलेज, चितवनको भरतपुरस्थित पुरानो मेडिकल कलेज लगायतका नर्सहरुले देशव्यापी रुपमा आन्दोलन गरेका थिए।
