सिन्धुपाल्चोक, ८ साउन २०८१
चीन सरकारले १८ महिनाको अवधिमै बनाइदिएको सुविधासम्पन्न नयाँ भवनमा सरेपछि चौतारा अस्पतालमा बिरामीको चाप बढ्न थालेको छ।
भूकम्पपछि आठ वर्ष प्रिफ्याबमा बसेर उपचार गर्दा न डाक्टर खुसी थिए, न विरामी । ठूलो वर्षा र हावाहुरी आउँदा उपचार सेवा नै रोकिन्थ्यो। तर, अहिले परिस्थिति फेरिएको छ। बिरामीले तुरुन्तै उपचार सेवा पाउँछन् । सफा अस्पताल, सेवामा प्रतिवद्ध चिकित्सक र कोठैपिच्छे राखिएका उपकरणले उपचारका लागि आउने बिरामीले सन्तोषको सास फेर्ने गर्छन्।
अस्पतालका निमित्त मेडिकल सुपरिटेन्डेन्ट डा. रुद्रमणि भण्डारीले बिरामीका लागि तय गरेको टोकन प्रणाली, उपचारपूर्व गर्ने व्यवहार र सबै सेवामा परिवर्तन गरेर उपचारमैत्री वातावरण बनाएकाले विरामीको आधा रोग अस्पतालभित्र प्रवेश गरेको केही समयमा निको हुने बताउनु भयो।
डा. भण्डारीका अनुसार नयाँ अस्पतालमा छिर्दा कुनै सुविधासम्पन्न प्राइभेट र विदेशी हस्पिटलमा गएर उपचार गरेजस्तै अनुभव सरकारी अस्पतालमा बिरामीले गरेका छन् । प्रत्येक बिहान सवा ९ बजे चिकित्सकसहित महत्त्वपूर्ण स्टाफको बैठक हुन्छ । इमर्जेन्सी र वार्डमा रहेका विरामीलाई २४सै घन्टा निगरानी गर्न चिकित्सकको समूह बसिरहन्छन् ।
अहिले नयाँ भवन ३९ कोठाको छ। पानी, बिजुली, सञ्चार र साधनको राम्रो व्यवस्थापन भएकाले उपचारमा आउने बिरामीलाई गुणस्तरीय सेवा प्रदान गर्न अस्पताल सफल भएको छ। बागमती प्रदेशबाट स्वीकृत ५० शग्यामा राखेर विरामीको उपचार हुन्छ। इमर्जेन्सी, जनरल ओपिडी, हाडजोर्नी, फिजियोथेरापी, ल्याब, एक्सरे, भ्याक्सिनेसन, क्षयरोग र एचआइभीको उपचारकक्ष भुइँतलामा राखिएका छन्। जनरल वार्ड, प्रसूति, अप्रेसन, बालरोग उपचार, फोटोथेरापी पहिलो तलामा राखिएका छन् । दोस्रो तलामा दुइटा अप्रेसन कक्ष, प्रोग्राम हल र पुस्तकालय छन् ।
अस्पतालमा सबै सिस्टम नयाँ र प्रविधियुक्त छ। नयाँ उपकरणले उपचारमा गुणस्तरीयता प्रदान गरेको छ। यति हुँदाहुँदै पनि मेन्टेनेन्स खर्च, कर्मचारी र बजेट पर्याप्त छैन।
प्रदेश सरकारबाट प्राप्त बजेटले गुणस्तरीय उपचार प्रदान गर्ने हाम्रो निरन्तर अभियान कठिन भएको डा. भण्डारीको गुनासो छ।
‘स्वास्थ्य बिमा भएका दुई सय बिरामीले दैनिक जनरल ओपिडी सेवा लिन्छन् । मासिक ३१ सयले जनरल ओपिडी सात सयले इमर्जेन्सी सेवा लिन्छन्,’ डा. भण्डारीले भने, ‘बढीजसो दम, रलचार, मधुमेह र पेटसम्बन्धी समस्या भएका बिरामी आउँछन्। साप्ताहिक रूपमा मानसिक रोगीलाई दुईपटक नाक, कार, घाँटीका विरामीलाई एकपटक उपचार सेवा प्रदान गरिदै आएको छ।
जिल्लाको मध्यभागमा रहेको चौतारा अस्पतालम चौतारा साँगाचोकगढी, इन्द्रावती, बलेफी, जुगल र पाँचपोखरी धांपालबाट उपचार लिन आउँछन् । आइसियू जटिल रोगको अप्रेसन र इमर्जेन्सीमा आउने १५ प्रतिशत बिरामीलाई रेफर गर्नुपर्ने अवस्था अझै विद्यमान छ।
